In sta campagna pè l’elezzione municipale, si parla di circulazione, di parkings, di rumenzule, di portu. È sì tutti i sugetti sò impurtanti, ci n’hè unu chì ci tene à core hè quellu di u patrimoniu. A Piazzetta tene à dumandà à i tutti candidati chì hè u so prugettu patrimuniale, è chì hè u so parè nant’à ondeci punti chì ci parenu di primura.
Cum'è l'Ordre des Architectes de Corse chì hà interpellatu i candidati à l'elezzione municipale (pè tutta a Corsica), i Socios, u Cullettivu Salvemu a Citatella o a cuurdinazione Terra, dumandemu à i candidati à l'elezzione municipale bastiaccia chì hè u so prugettu patrimuniale in generale, è in particulare nant'à unepochi di punti.
1. Chì hè u vostru prugettu patrimuniale per Bastia ?
2. U cunventu San Francescu
Custruitu à u XVIu seculu, hè statu u più grande cunventu di Corsica. Trasfurmatu in ospidale, hè oghje à l’abbandonu dapoi più di trenta anni. A situazione hè dinunziata dapoi anni è anni da un cullettivu di vicini. Ci sò stati parechji prugetti di riabilitazione chì ùn sò sbucciati.
Digià, in u... 2008.
Digià, in u... 2008.
3. U cunventu Santa Chjara
Face guasi trenta anni chì l’anzianu cunventu Santa Chjara aspetta. A prigiò hè abbandunata in u 1993. In u 2002 hè compra da una sucetà immubiliare aiaccina. Dapoi, più nunda per stu bastimentu in piena citatella.
Da leghje in Corse-Matin, sempre in u 2008...
Da leghje in Corse-Matin, sempre in u 2008...
4. U palazzu Caraffa
Stu palazzu di sgiò hè statu compru da a municipalità bastiaccia in u 2003. Ci hè statu un prugettu di museu, ma ùn si ne sente più parlà è u casale si ne và di male.
Ne parlava Corse Net Infos, in u... 2011.
Ne parlava Corse Net Infos, in u... 2011.
5. Paese Vechju
Face u chjam’è rispondi à Paese Novu. Abbandunatu à a fine di u XIVu seculu, porta dinù i nomi di Cutone o Paese Grecu.
Un articulu di Corse-Matin, in u 2011
Un articulu di Corse-Matin, in u 2011
6. Monserratu
Cù a Scala Santa, replica di quella di San Ghjuvanni in Lateranu di Roma, a cappella di Monserrà hè una di e curiusità è unu di i giuielli di Bastia.
7. E muraglie di a cità
L’antichi muri di “A Bastia”, a prima furtidicazione ghjenuvese di Bastia anu più di 500 anni, ma pare ch’elli sianu pochi à primurassine.
Ben ch’elli sianu stati scritti à i munumenti storichi in u 1936, i scumpienti ùn mancanu. Chì fà per piantà d’arruvinà sti muri chì sò ciò chì a cità hà di più bellu ?
8. I chjassi di Bastia
In u 2017 A Piazzetta publicava una Google Map di i chjassi di Bastia, cù i punti d’interessi patrimuniali è storichi. U nostru prugettu, mudestu, di scopre lochi forse micca cunnisciuti da tutti hà fattu nasce un interessu (sughjetti in Corse-Matin è Via Stella, 44.000 visite pè a carta virtuale). I puteri publichi menu. Quì dinù i cantieri ùn mancherebbinu : chjassi da pulisce, muretti da rifà, o da apre per quelli chì sò stati chjosi da i privati.
Avemu fattu una carta di i chjassi di Bastia https://t.co/gTnISZBhSG pic.twitter.com/l0UhhTvWqt
— A Piazzetta (@aPiazzetta) March 6, 2017
9. L’albergu “Ile de beauté”
A l’abandonu dapoi u 1991, l’albergu di l’anni trenta hà fattu nasce una pulemica in u 2017 dopu chì u prugettu di residenza di lussu sia statu resu publicu. Prevede a dimulizione di a facciata, per turnà à custruiscela è integralla in u prugettu novu.
10. U patrimoniu campagnolu di Lupinu
A sapemu, l’orti di Bastia si truvavanu in San Ghjisè, Lupinu è in u Fangu. Di u passatu campagnolu di a nostra cità fermanu qualchì aghja da salvà (cum’è quella intighjata di Campu Ventosu), terrazze di cultura (à u Machjò), palmenti (in Agliani). Nant’à u fiume di Lupinu fermanu una decina di vechji mulini.
11. L'attelli di i treni
Di u passatu industriale di a cità fermanu l’attelli di i treni, in u Fangu. Un prugettu immubiliare prevede a so destruzzione cumpletta. Sò a memoria di u passatu operaiu di Bastia.
ritrattu : Marius d'Oriano
12. U patrimoniu immateriale : i nomi di lochi
Chì fà per salvà è mantene i nomi vechji di Bastia ? Sì a doppia tupunimia esiste in Terra Nova è in certi quartieri, chì fà pè u restu di a cità ?
È chì si pò dì di l'orribili nomi dati à e residenze chì sortenu di terra ("Turn Street", "Green Avenue" ecc...)
Publicheremu e risposte di i tutti i candidati quì !
Speremu ch'elli ci rispunderanu tutti, ch'ella sia in corsu o in francese.
E risposte di a lista "Bastia più forte inseme"
E risposte di a lista "Bastia in core"