"Scrivimu a nostra lingua", eccu u librucciu !

20/04/2018

Dopu à u blog, hè natu u librucciu per amparà à scrive u corsu. Un "Intricciate è cambiarine" 2.0 è in culori.

Brandon Andreani hè un giovanu studiante passiunatu di lingua corsa. Stufu di sente dì chì : "eiu parlu corsu ma ùn sò micca scrivelu", s'hè lanciatu in un'opera di demucratizazione di a scrittura di u corsu. Hè cusì ch'ellu hè natu u blog Scrivimu a nostra lingua, ch'ellu si pò seguità dinù nant'à Twitter.

Hè faciule, face ride è si ritene. Esempii :

Pasqua o Pasquà ?

Pasqua è Pasquà

- Pasqua = Pâques. Oghji, hè Pasqua!

- O Pasquà! = Pà chjamà à Pasquale (Pasquali). " Senti o Pasquà, senti senti o Pasquà! "

Disegnu di l'amicu Tittò Limongi chì vo pudeti ritruvà in lu librettu Scrivimu a nostra lingua! 😊

Bona Pasqua à tutti! pic.twitter.com/lDkPWWqBEG
— Brandon G. Andreani (@BrandonAndreani) 1 avril 2018

Scena o cena ?

Cena 🍝 è Scena🎙️

- Cena = Dîner, souper. Cène. A cena hè u ripastu di a sera.

- Scena = Scène. L'artisti collani nant'à a scena di u teatru.https://t.co/tVfOfkz9Yu pic.twitter.com/4WlxIi47YT
— Brandon G. Andreani (@BrandonAndreani) 4 mars 2018

Veghja o vechja ?

Veghja è Vechja

- Veghja = Veillée. Chì belli stondi passati à veghja!

Veghja (Vigilia, vighjilia) = Veille. A veghja di u baccu, t'aviamu a paura.

Veghja (Veghje) verbu vighjà, veghjà = Il/elle veille. Veghja tutta a nuttata.

- Vechja = Vieille. " A vechja casa di Babbu". pic.twitter.com/hdKZaIXkQi
— Brandon G. Andreani (@BrandonAndreani) 16 février 2018

Sonu o sonnu ?

Sonu 🔊 è sonnu 😴

Sonu = le son: Si sintia u sonu di u cornu. Pudeti calà u sonu (baisser le son) par piacè?

Sonnu = sommeil: T'aghju u sonnu! Chì sonnu! pic.twitter.com/hJAvFpxvCt
— Brandon G. Andreani (@BrandonAndreani) 18 janvier 2018

Hà inventatu un generu novu di pedagogia di a lingua corsa. Un "Intricciate è cambiarine" in figurette è 2.0.

Me, Mè è M'hè

- Me: U me ( U mio, u mo) fratellu, a me casa, i me ghjatti...

- Mè: Veni incù mè! Pensi com'è mè! A m'hà data à mè! Magnemu ind'è mè? Hè più ghjovana cà mè.

- M'hè: M'hè sempri piaciutu u basket! Hè a prima cosa chì m'hè vinuta.https://t.co/4mYgYt40gf pic.twitter.com/J5bdg9THfz
— Brandon G. Andreani (@BrandonAndreani) 28 mars 2018

A spiega u so autore : "U scopu hè di dà à tutti, di manera simplici è a più piacevuli pussibuli, incù i disegni, tutti l'arnesi par scriva a nostra lingua. "

Dopu à una mostra à a Casa Studientina Claude Cesari st'inguernu, hè esciutu u librettu (270 esemplarii stampati) cun l'aiutu di u CROUS di Corsica è di a Ghjuventù Paolina. Hè spachjatu di rigalu.

Allora avà aspettemu a seguita : "U prughjettu avà hè di publicà u sicondu librettu, ripigliendu u prima ma più spessu è più bellu incù parechji pagini è disegni in più grazia à l'aiutu di tutti quilli chì dani un calcusellu nant'à Leetchi, da pudè allargà a distribuzioni. Stu sicondu librettu sarà in vendita in u più lochi pussibuli, mittenduci un prezzu raghjunevuli da ùn rompa a catena di a pruduzzioni è ch'ellu rispondi à a dumanda chì cresci."

Allora sì l'idea vi piace, pudete participà nant'à sta pagina Leetchi per aiutallu. Forza !