Commentaires

Aucun commentaire
Soyez le premier à réagir
A Piazzetta

Cummemurazione di l'impiccati d'Oletta

Rédigé le 17/09/2017
Rumanu

À una settimana di a cummemurazione almanaccata in Oletta da unurà a memoria di i naziunali straziati è marturiati in piazza di u Cunventu d’Oletta (iè iè u parcheghju di a discuteca A Conca), vi prupunimu qualchì filare da assuttiglià e vostre cunniscenze è accatizzà a vostra brama di participà ci, oltre e sòlite cunferenze serà celebrata una messa in lingua nustrale cantata da i cantori di i cuntorni.


Messa in cuntestu

Menu cunnisciuta chè quella passata niulinca (1774), u racontu di l’impiccati d’Oletta hè dinù ellu colmu à cummossa è cum’è à spessu ind’è a nostra storia a tragedia greca u s’hà ingutuppatu (si ne parlerà più dopu cù Maria Gentile, Maria Ghjentile per a ghjente di u locu), chì stalvò di settembre di u 1769 qualchì mese dopu à Ponte Novu si viderà più in là chì u timing ùn fù sceltu à casu.

E fonte

Sò parechje e fonte da ammintà issa storia chì cambia nome secondu u partitu, cunghjura per l’uni è impresa militare per l’altri.

U primu à impennà fù l’abbate de Germanes chì pigliò tandu e pratese di i Generali francesi chì cumandonu a spedizione, per ellu Paoli avia almanaccatu un pianu da attaccà u cunventu d’Oletta è pulzà a guarnigione cullucata nentru, u perchè di issa story telling vera, u pudemu induvinà...

Per Jacobi (grafia di prima), l’olittesi casticati da l’invasori è azzizzati da l’abbate Saliceti si ribellonu è ebbenu da prugettu di sparnuccià polvera nù i fundamenti di u cunventu è... avete capitu.

Arrimberemu u nostru lu prupòsitu nantu à e testimunianze di Antoine de Morati di San Fiurenzu (merre da u 1888 à u 1901, cunsigliere generale da u 1858 è magistratu) chì publicò in lu 1894 e sfarente pezze di u prucessu, si veca d’altronde per andà più indà : La conspiration d’Oletta, 13 14 février 1769 da Antoine de Morati, in Bulletin de la société des sciences historiques et naturelles de la Corse, 1894.

Cuntestu

Simu di ferraghju di u 1769, u paese d’Oletta pernu di u Nebbiu hè occupatu da una guarnigione di circa 1500 sullati cumandati da u cavalliere d’Ampus. Cum’è in ogni locu di soiu Paoli ci avia partitenti è amichi fidati frà quessi, l’abbate Francescu Antone Saliceti, di una famiglia di spiccu l’ecclesiale era vultatu di pocu in Corsica per sìntimu naziunale.

U pianu paulistu era chjaru, incugnà patriotti in paese di Oletta è aspettà l’affollu di i naziunali nebbiulinchi/nebbiusgini capitanati da Clemente Paoli è piglià i francesi in furchetta, scelsenu u 13 è 14 di ferraghju chì tandu San Valentinu...via, ma a pignatta fù scuperta chì un certu Petru Boccheciampe s’avia palisatu u leccu è u meccu lu bruttu !

Paoli attempò l’operazione olittese è messe l’accampu in Barbaghju, i naziunali olittesi ammintati più sopra volsenu dà di manu à i soi, fù u 13 da mane à l’alburighjata ch’elli affacconu in Barbaghju cundutti da l’altieru abbate Saliceti, ist’ultimu serà feritu da una sparata è morse dui ghjorni dopu malgradu l’affollu di Clemente Paoli chì li porse u so cavallu da ch’ellu fussi curatu senz’altru.
Nunda ci valse, Saliceti andete à fà e conche è à u fà di u ghjornu issu maladettu 16 di ferraghju 600 corsi ghjacenu in pianu è i vivi seranu pulzati...


A cundanna è u màrtire

U 14 da mane, d’Arcambal cumandante di u Nebbiu fece apre un’infurmazione contr’à una trentina d’olittesi palisati da u vittulu Boccheciampe, 18 seranu cundutti in Bastia.

U 3 di marzu u duca di Choiseul decide ch’ella hè a “cunghjura” d’Oletta un crimine di lesa maestà.

A sintenza fù resa u 17 di lugliu, cinque inculpiti funu cundannati à esse arrutati, (detta altrimente straziati nant’à a rota) simu dui mesi dopu à Ponte Novu a vulintà era di annientà a ribellione è terrurizà à u sensu primu a populazione.

I Cundannati

Don Petru Leccia figliolu di Stefanu
Francescu Antone Santamaria dettu Tottò, 24 anni
Ghjuvan’Dumenicu Cermolacce 25 anni
Ghjuvanni Guidoni 26 anni di u Poghju d’Oletta
Ghjuvan’Camellu Guidoni 33 anni di u Poghju d’Oletta

Renucciu dettu u Rossu cundannatu à pate e galere ab eternu

Per contumacia 12 cundanne à morte è 5 à e galere

Eccu una testimunianza chì ammenta a ghjurnata di u 25 di settembre, st’ultima hè scacciata da u « Bulletin de la Société des Sciences Historiques et Naturelles de la Corse » (nov.- déc. 1893), è citatu da Jacques Gregori in « Nouvelle histoire de la Corse » :

À i cundannati li tuccherà à :

« faire amende honorable devant la principale porte de l’église-cathédrale de Bastia, ainsi que devant la porte de la principale église d’Oletta, à y être conduits et menés nus, en chemise, tenant en leurs mains une torche de cire ardente du poids de deux livres, et là, à genoux, à dire et déclarer à haute et intelligible voix que méchamment et proditoirement ils avaient conspiré contre l’Etat et les sujets du Roy dont ils se repentaient en demandant pardon à Dieu, au Roy et à la Justice ; ce fait, être menés et conduits à la principale place d’Oletta et sur un échafaud dressé à cet effet, avoir les bras, jambes, cuisses et reins rompus vifs par l’exécuteur de la Haute Justice, ensuite être mis sur une roue la face tournée vers le ciel pour y demeurer tant et si longtemps il plaira à Dieu leur conserver la vie, et leur corps morts être exposés ensuite sur une roue dans le grand chemin qui conduit de Bastia à Oletta, leurs biens, meubles et immeubles en quelque lieu qu’ils soient situés acquis et confisqués au Roy et, avant l’exécution, appliqués à la question ordinaire et extraordinaire pour apprendre par leurs bouches la vérité d’aucuns faits résultant du procès et le nom de leurs complices ».

Per i micca francòfoni, u 25 di settembre da mane dopu à d’atroci martiri, da fà li palisà d’altri nomi i cundannati funu vestuti da penitenti cù un camisgiu biancu è un cirone in manu è s’avvionu dananzu à a chjesa Sant’Andria d’Oletta, sfragellati da u boia, e so salme funu esposte à u celente.

A casa di Saliceti fù spiantata è eretta una culonna d’infamia (a pìramida ùn era forse più in vògula ?) è i patriotti corsi funu sclusi da a grazia di settembre di u 1769 è ci volse aspettà u 17 di lugliu di u 1778 chì permesse à i contumaci di turnà in Corsica, a culonna d’infamia fù spiantata è Renucciu liberatu di e galere.

Maria Gentile o l’Anticone nustrale ?

Fù Maria Ghjentile ammintata tante volte dipoi Lucciardi, è di pocu si ne sente parlà tante è più è ghjè una bona ! Si pensa à La Passion de Maria Gentile pezza di teatru scritta da Maria Ferranti, u bustu à l’Assemblea di Corsica è u cullegiu di San Fiurenzu chì purterà frà pocu u so nome.

Hè vera chì à Maria u si meriteghja u so strapuntinu ind’è u monte Limpia nustrale. Frà i patriotti marturiati cumparì u so prumessu, secondu Jacques Denis sturianu chì studiò l’impegnu di u regimentu Jurassianu in Corsica, Maria Gentile si chjameria Belgodere è u so prumessu Ghjuvanni Guidoni, secondu Yvia Croce in “La Révolution Corse (1729-1769) si chjameria Maria Gentile Guidoni ed era fidanzata à Don Petru Leccia, in fine per Ghjuvan’Petru Lucciardi autore di una pezza di teatru in trè atti “Maria Jentile”, publicata in 1912, si chjameria Maria Gentile Guidoni nata in Poghju d’Oletta è fidanzata à Bernardu Leccia d’Oletta.

Tramandata à bocca, ci vene difficiule à disciuplicà u veru di a finzione, però à l’entre di issu vaghjime di u 1769, Maria pienghje u so prumessu, in piazza di u cunventu l’òrdine hè cunnisciutu da tutti è Maria chì pasce nantu à a vintina si disse forse sti qualchi filari di Rinatu Coti in U Maceddu :

« Comu ! Aghju persu u lumu di l’ochji, a luma di u cori, u punteddu vivu di a casa, è staraghju quicci à mani bioti, à spaddi scunsi di pinseri è di primura… ? »

Puntata cum’è Anticone da una forza di l’ìntimu chì li disse chì « un mort n’a pas besoin d’être tué deux fois », a legge di u tirannu ùn la pobbe accettà Maria è u scolsu da e so liaglie per dà li sepultura degna è cristiana.

A casa di Maria Ghjentile, in u paisolu di Munticellu, à u Poghju d'Oletta.

Per compie la v’invitemu à scopre u Lamentu à Maria Ghjentile di u gruppu I Campagnoli chì fù scrittu da Ghjacumu Fusina.


Bibbiugrafia :

Description de la Corse de A. Giustiniani, Préface, notes et traduction de Antoine-Marie Graziani, Editions Allain Piazzola (1993).
– Jean-Ange Galletti, Histoire illustrée de la Corse
– Paul Arrighi, La vie quotidienne en Corse au XVIIIe siècle, Hachette (1970).
– Antoine-Marie Graziani, Pascal Paoli, Ed. Tallandier (2004).
– Michel Vergé-Franceshi, Paoli, un Corse des Lumières, Ed. Fayard (2005).
– Jacques Gregori, Nouvelle histoire de la Corse, Jérôme Martineau (1967).
– James Boswell, Etat de la Corse, présentation de Jean Vives, Ed. CNRS (1992).
– Voltaire, De la Corse, Marzocchi (1989).
– Hyacinthe Yvia-Croce, Quarante ans de gloire et de misère, La Révolution de Corse (1729-1769), Albiana (1996).
– Gaston d’Angelis, Don Giorgi, Georges Grelou, Guide de la Corse mystérieuse, Tchou (1995).
– René Sédillot, La grande aventure des Corses, Fayard (1969)
– Rinatu Coti, U Maceddu, pezza di teatru, Cismonte è Pumonte Edizione (1988).
– J P Lucciardi, Maria Jentile, Ollagnier (1912).
– Damien Bregnard, Jacques Denis, Philippe Riat : Des Jurassiens à la conquête de la Corse
- Gherardi E. F.-X., Les Lucciardi. Une famille corse de poètes et d'instituteurs, Albiana, 2010
- Histoire des révolutions de la Corse, par l’abbé de Germanes, Demonville
- La conspiration d’Oletta, 13 14 février 1769, da Antoine de Morati, in Bulletin de la société des sciences historiques et naturelles de la Corse. 1894
- Le mémorial des Corses : La conspiration d’Oletta.