Natale Natale…

Natale Natale…

21/12/2018
Patrick Alingua

Eccu un'altru artìculu di l’attellu immersivu « Storia, Patrimoniu, Cultura è Tradizioni » di Praticalingua pè A Piazzetta.


Natale hè colmu à tradizione precristiane ch’omu hà u so chì fà à disciuplicà, si sà solu chì à quell’èpica di l’annu festa pagana è natività cristiana s’accopianu, usi antichi è tradizione nove s’intreccianu pè inghjennà quella detta « Magia di Natale ».

Introitu

Casca a nàscita di Ghjesù Cristu inde u tempu u più bughjicosu di l’annu induve a notte supraneghja u ghjornu. Sò tanti l’usi è e tradizione antiche chì u cristianisimu hà ammanitu è chì venenu oghje supranati da a sucetà di cunsummu triunfante. Aiò à innultracci inde l’arcani di Natale !

1) U Sulstiziu

Hè u sulstiziu un avvenimentu astronomicu chì si face quandu chì u Sole vistu da a Terra ne ghjunghje sia à u so stremu meridiunale sia u so stremu settentriunale. I ghjorni chì avvinghjenu u sulstiziu d’estate (Ver di San Ghjuvà) sò i più longhi di l’annu è quelli chì avvinghjenu u sulstiziu d’inguernu sò i più corti di l’annu.

Sarebbu u 25 di decembre u ghjornu u più cortu di l’annu, u ghjornu induve e tènebre supraneghjanu u lume, si sà chì manu à manu crescerà u sol invictus chì materializeghja a corsa di u tempu, chì a si spasseghja da sulstiziu à sulstiziu, da a morte sinu à a Resurezzione inde un cìculu infinitu. Capiscerà omu perchè chì i cristiani anu vulstu fà nasce u so Salvatore à stu periudu quì chì " U ghjornu di Natale face tutte e lune ".



Si sà chì, puru ind’è a nostra Surella d’Irlanda esistia un’adurazione di u sole chì rinasce, prova si n’hè in u tempiu megaliticu di Newgrange alzatu da i Celtii induve e spire di u sole entrianu inde a càmera funeraria u ghjornu di u sulstiziu !

2) U Sol Invictus

Oltre i Celti è i Germanichi chì ludavanu u sole chì rinasce, pudimu dinù ammintà a festa ghjudea di Hanoucca, dinù ella vicinissima à u sulstiziu chì hè dinù chjamata festa di i lumi.

Ind’è i rumani, prima di a cristianizazione di l’Uccidente era chjamata issa festa di u 25 di dicembre Dies Natalis Solis Invicti chì currsiponde à u Sol Invictus chì torna à sorge di a bughjura ma dinù à a nàscita di a divinità sulare Mithra.

Da sapè dinù chì i rumani festighjavanu e Saturnale da u 17 à u 24 di decembre, sette ghjorni di bambuscia, induve l’Omi s’offrianu rigali è induve e case eranu adurnate cù frasche di pinu o di leccia.

In u 274 decide l’imperatore Aureliu, di operà un sincretisimu unifichendu i sfarenti culti rumani da accuntentà à tutti, è da materializà stu cultu novu di u Sol Invictus, venerà alzatu un tempiu in Roma.

Da leghje :
Le culte de Sol Invictus
è
Le 25 décembre, un jour truffé de dieux

3) Natale : A Natività

Bench’ellu ùn fussi à principiu un puntellu di sta religione nova chì incalcava di più à nantu à a morte è a resurezzione di Ghjesù Cristu, venerà longu à i sèculi rialzata quella Natività di u Bambinu.

Per tutte e ragione sviluppate più sopra, i cristiani ùn ne pudianu fà di menu ch’è di fà nasce u so Salvatore, u so « Lumen christi », lume di u mondu à tempu à u sole chì rinasce.

4) E sette veghje

Frà tanti usi è tradizione ch’omu usservava à i tempi natalecci, emu vulsutu principià cù E sette veghje.

Era l’usu in certi paesi corsi cum’è in Zalana o Lama di andà à visità sette case, sette veghje nanzu di a messa di Mezanotte.

Dice Ghjuvannina Giuly intervistata da Pierre-Jean Luccioni in Tempi Fà : fetes religieuses, rites et croyances populaires de Corse : « Era l’usu di visità omancu sette famiglie di u quartieru primu di andà à a messa […] s’appruntava inde una paghjola, un genneru di « punch » cù cinque litre d’acqua vita è di zùccaru, chè no chjamavamu l’acqua vita brusgiata… »

5) U focu natalescu

Ci dice Ghjaspeppina Giannesini in Tempi Fà : fetes religieuses, rites et croyances populaires de Corse chì dipoi a « Prestoria, tene u focu un rollu centrale inde e ceremonie. U focu, cù a cucitura, muta, da u crudu à u cottu, è scambia a materia in fume immateriale. Eccu perchè inde e credenze, permette e cumunicazione è i scambii trà i mondi ».

Sò alzate ste fucareccie à mumenti particulari di passagii pè adunisce e cumunità, à a cumunità di i vivi s’invita quella di i morti aduniti pè celebrà u tempu di u Passagiu.

Hè sempre viva quellu usu di i fochi pè festighjà u ritornu di a Luce, duve e ghjurnate ùn calanu più, duve a luce manu à manu supraneghja, vince u bughju è inghjenna a speranza di a vita nova.

Per Ghjaseppina Giannesini, u focu : « Simbulizeghja a famiglia, u fuculaghju. Sinu à pocu, i censi di populazione eranu cuntabilizati secondu i fochi chì designavanu à le volte u fuculaghju è a famiglia. I ceppi (di natale) raprisenteghjanu l’individuvi chì u focu adunisce, ciò ch’omu ritrova inde u focu di Natale… »
Ne hà riguaratu Roccu Multedo unepochi di i nomi dati à sta fucareccia di Natale : in Calvi hè u fucone di Natale, u capifocu in A Vinzulasca, u fucarolu in Muriani, u fucarinu in Bunifaziu, u cappile in Ascu, u castellu in Niolu, a capanna in Speluncatu, u rochju in Sna Fiurenzu, u faloru in Zalana…

Si leghje una testimunianza bella à nantu à u situ di l’Adecec intornu à u focu di Natale, un travagliu prupostu da Petru-Ghjuvanni Bresciani :

« I fochi di Natale avvampavanu e piazze à e chjese. Eranu tamante fucaracce chì devianu brusgià durante a notte a più longa di l'annu ma dinù sin'à Capu d'annu mentre chì i fochi di a San Ghjuvà duranu pocu.
I fochi (di Natale è di a San Ghjuvà), ceremunie precristiane piazzate à l'estremi di u ciclu, sò cumplementari. Focu cumunitariu, ma à l'incuntariu di u focu di a San Ghjuvà, u focu di Natale ùn era micca beneditu da u prete.

Ci vulia assai legnu, ghjera l'affare di tutti. A racolta di u legnu cuminciava à l'iniziu di dicembre. Ghjovi, dumenica è dopu à a scola, i zitelli andavanu à cercà parechji ceppi. Per i lochi induve u legnu ùn era micca diviziosu, si pigliava u legnu per tutti i mezi. In l'Isula, ci vulìa à badà tuttu ciò chì era di legnu ! In Calvi, u focu era fattu cù e vechje barche, in Calinzana chjamanu " feux de rien " i fochi di Calvi. In Aiacciu, si facianu trè fochi : piazza di a citadella, piazza Foch è annantu à a Piazzetta. In Balagna, u focu di Natale ghjovava à pulì l'oliveti è à sbarazzassi di i ceppi brusgiati dopu l'incendiu di u 1956.

U focu era una vera custruzzione, affare di spezialisti, e vechje portavanu i carchi di legnu, eranu messi à modu speciale, perchè u focu devia brusgià da u bassu è micca da u capu, ùn devia esse troppu vicinu à a chjesa dinù. L'apertura di a cappanella si facìa sempre à a tramuntana. Cusì u focu era fattu à modu precisu, si chjama u capile in Ascu o a capanella in Pioghjula.

A sera nanz'à a messa di mezzanotte, si picciava focu, ghjera una meraviglia per i zitelli. Dunque, era un focu tamantu, u fucaracciu cum'ellu si dice in Carbuccia, alimentatu da i giovani di u paese, scampannavanu dinù.

Nanzu d'entre in a chjesa, chì era ghjacciata, a ghjente andava à scaldassi vicinu à u focu. Parechje volte, durante a messa, a ghjente surtia di chjesa per andà à scaldassi, l'omi ch'ùn andavanu à a messa stavanu in giru à u focu. Dopu à a messa, tutt'ugnunu pigliava un tizzone, in Carbuccia stu pezzu di legnu era per accende u focu di Natale in casa è in Peri era messu in un tufone di muru, per a prutezzione di a casa, ritu magicu chì si ritrova dinù in certe tinute di e muntagne di Haute Saône per luttà contr'à l'ochju neru.
L'omi stavanu in giru à u focu è cantavanu una parte di a notte. Mumentu unicu pè amparà l'arte di predì u tempu. Quandu a notte era quasi finita, chì u ghjornu devia spuntà, i pastori fighjavanu e volute di fume chì collavanu in celu. Induvinavanu u tempu di l'annu o e " tendenze " meteorologiche maiò : annu piuvosu, seccu, freddu, ventosu … si dicìa ch'ellu si guardava i signali.

U focu devìa durà sin'à Capu d'annu, quandu ellu era in cendere, a ghjente venia à cercà i segni chì eranu interpretati : presaghji boni o gattivi. E cendere avìanu un putere profilacticu : strughjianu i pidochji, assicuravanu a fertilità di a terra cum'è quella di u focu di a San Ghjuvà ».

Da vede nant'à u situ di l'Adecec

6) U cunfocu

In Bastia, s’ampara cù l’Almanaccu bastiacciu : Tradizione viva di Bastia è di u so circondu chì a vigilia di Natale u Guvernatore ghjenuvese offria à i principali il cunfuoco. Fattu si l’inchinu è a presentazione di l’augurii u Guvernadore lampava inde u focu chì si tenia in piazza di a Corte un caraffone di vinu è un piattu colmu à dulciumi, tutti si ritruvavanu dopu inde a Sala Maggiore di u Palazzu di i Guvernatori pè adilettassi di frutti è dulciumi.

Hè stata individualizata da famiglie nutabile di spiccu ghjenuvese chì rifecianu sta ceremonia in casa soia, induve ogni cumpunente di a famiglia mettia una parte di u so piattu inde una cuppa è u più giovanu versava u cuntenutu detta « a parte di U Bambinu » inde u focu. A famiglia recitava tandu un pater è un ave pè i defunti è si dicia sta pregantula :

"Eiu vi pregu anime sante
Eiu vi pregu tutte quante
Site state cum’è noi
Si venerà cum’è voi
Chì Dia vi dia pace è riposu."

7) U ceppu di Natale

U ceppu di Natale, u capifocu, u capiceppu, u natalecciu, u rochju di Natale, u muzziconu, tante parolle per indicà u ceppu assai grossu è abbastanza longu "chì hè l'anima di u focu famigliale di Natale è chì averà da brusgià sinu à capu d’annu ».
Di regula, hè un ceppone di leccia tagliatu pocu fà, chì ogni babbu di famiglia andava à cercà è era brusgiatu a sera di Natale. In Corsica Suttana, si mettia, in più di u ceppu di Natale, un ceppu per ogni membru di a famiglia.
Natale era una festa induve a famiglia pigliava a so forza per l'annu novu, in l'addunita di e generazioni in giru à u babbu di famiglia, maestru di a ceremunia.

8) Una notte senza para

Ci dice Ghjaspeppina Giannesini in Tempi Fà : fetes religieuses, rites et croyances populaires de Corse chì « Questa notte vene nanzu à a rinàscita di u sole è appartene ella à i morti, à e divinità, i mondi si toccanu è s’intreccianu. Notte incantevule, notte iniziatica, hè u mumentu induve in Corsica, e precantule ponu esse tramandate ».

Inde a so Cronica sacra, santuario di Corsica ci conta Salvatore Viale chì a Notte di Natale in Biguglia piuvia a manna, ciò chì vene à rinfurzà l’embiu particulare chì pudia regnà pè i nostri cuntorni !
In tanti paesi corsi, si dicianu l’incantesimi à partesi da mezanotte in puntu, l’amparanti ùn andavanu micca in chjesa pè a Messa di Mezanotte è aspettavanu chì a ciccona sunessi i dodeci chjocchi.

Si ritrova quì una testimunianza bella à nantu à u situ di l’adecec di Cervioni, hè cuntata da Pierre- Jean Bresciani è circuscrive l’incritta magica à i trè pichji usservati  :
«  Ci era u primu pichju : e campane si mettenu à ciccunà in u silenziu di a notte. Più tardi, ci sarà u secondu pichju… è u terzu. Frà u primu è l'ultimu, chjamendu per a messa, tuttu hè pussibule, e forze di u Male ponu esse abrugate. E fole dicenu : " ghjè u mumentu magicu ". Durante l'ultimu chjoccu di campana, u vitellu d'oru s'affacca in u Razu di Techjalata, sopr'à u Pitrosu. Appartene à quellu chì u vole piglià.
In Carbuccia, per u primu chjoccu, i zitelli andavanu à cercà u sambucu, tenutu in casa l'annu sanu per fà fughje i spiriti gattivi è i mazzeri.

Ma sopr'à tuttu, frà u primu è u terzu pichju, s'amparanu tutti l'incantesimi, i sicreti vardati è i risponsorii, chì sò tante formule o preghere per fà rinculà u male, e malatìe … E più vechje (di regula e donne) imparanu i segni è l'incantesimi à i zitelli. Sò trasmessi in l'uralità, ùn ponu esse scritti. Sò detti in secretu, vicinu à u fucone. L'iniziatu ùn deve lasciassi andà à a sede o à u sonnu durante a ceremunia. U passaghju da u prufanu versu u sacratu si face davant'à u focu, tuttu cumincia è finisce da a Croce… »

Ghje dinù u mumentu sceltu da i pastori niulinchi per recità l'incantu di l'acula, per a prutezzione di e bande : per " incantà " l'acula, piglianu trè petre (à u nome di u Babbu, di u Figliolu è di u Santu Spiritu) è appinzanu l'ochji versu u celu recitendu l'incantazione. Dopu, mettenu e petre in terra, simbulu di a banda, petre à l'appumessu di l'acula. Passa è vene frà u profanu è u sacratu ».

Senza para era sta note di Natale, in certi paesi nebbiisgini si allestia u « piattu di u puvarettu » un piattu in più pè i più poveri di a cumunità, in d’altri paesi s’aspettava a visita di u Sgribu (u vagabondu) è si dicia dopu à a so ghjunta : " Bon Natale à i chjuchi è à i maiò, par Sgribu a porta s'apri sempre ! ".

9) Filastrocche di Natale

"Canta canta ros'è fiori
Natu hè u nostru Signore
Natu hè à Betelemme
Al mezu al bue à l'asinellu
Per cuprì à Gesù bellu
Ùn ci era fascia nè pannella
À chì lu sà è à chì lu dice
À chì ùn lu sà ghjustu hè d'amparallu
À la fine di lu mondu
Ci ritruvaremu tutti riuniti. "

Filastrocca (Citata in Tempi Fà fêtes religieuses, rites et croyances populaires de Corse)
« Maria lavava
Ghjiseppu stendia
U figliu pienghjia
Da u fretu ch’avia.
Stà zittu u mo figliu
Ch’avale ti pigliu
U latte l’ai pigliu
È pane ùn ci n’hè.
A neve indè i monti
Falava da u celu
Maria cù u so velu
Cupria à Ghjesù

10) A messa di Natale, " u sole di mezanotte "

Ci conta torna Pierre- Jean Bresciani citatu in un articulu di l’Adecec :
« In i paesi, versu l'iniziu di u seculu, a messa di Natale era un spettaculu […] Dopu à una piantata à u focu, e donne entrenu in furia in chjesa, l 'abbatini eranu i primi à stallassi. Versu mezanotte, u prete ghjunghjia. I cantori si mettenu inseme, vicini à l'altare.

Ghjunghje u mumentu. Un abbatinu scuzzulava una tintenna, l'omi attardati entrìanu. A messa pudìa cumincià. Tutti i candeli eranu accesi, l'altare era schjaritu da u lume di i cironi. Una chjesa trasfigurata da a magia di u mumentu è di u lume.

Ghjera una messa longa, cù parechje letture, i zitelli aspettavanu a presentazione di u Bambinu.

Un Gloria In excelsis Deo magnificu risunava. U Bambinu, piattatu daretu à una tendina, era svelatu à u mumentu di u Gloria di a messa di mezanotte, per l'adorazione da u populu cristianu. In certe chjese, cum'è in Santa Lucia di Bucugnà, u Bambinu era sciaccamanatu. Ogni tantu, si mughjava : " hè masciu, hè masciu ! "
Era fattu u bambinu di cera o di legnu è raprisentava à Cristu nascitoghju. U Bambinu cullucatu inde u presepiu cuntrastava cù u restu di i santunelli. À spessu era velatu daretu à una tendina è spanticatu, dopu à a messa a ghjente sfilava pè adurà lu ».

Natale era un mumentu di tregua, i banditi pudianu assiste à a messa di mezanotte, ghjera tacitu.

11) I Canti natalecci

Eccu vi un censu cumpiitu mancu stampa di i canti intunnati da i cantori nustrali :
" Adeste fideles " : ritimu allegru, invitu à parte versu Betleemme, à a seguita di i pastori, per l'adorazione di u Bambinu.
https://www.youtube.com/watch?v=TbV3CrQ6Sa0

" Chi vol vedere " : un altru cantu classicu di a Natività. hà bisognu di parechje voci, mette in scena un chjam’è rispondi trà pastori è fideli.
https://www.youtube.com/watch?v=_1gfP5RmYaQ

" Tu scendi da le stelle " hè un vechju canticu di u seculu dicennove
https://www.youtube.com/watch?v=68mCdwb4A3k

E nanne e più cunnusciute in rapportu cù a Natività :
" A Nanna di u Bambinu ", di Monsignore Paul-Mathieu de la Foata (fine di u 19esimu seculu), ch'ispirò " Ciucciarella ".
https://www.youtube.com/watch?v=t9QYbOyd3UQ

" Dormi dormi bel Bambinu " esciutu da a " Lira sacra ". Era certe volte cantatu durante à messa di Natale, ma assai cantata tuttu l'annu.

" Ninni nanna ", aria di u Cuscionu è di Zicavu. Ghjè l'adorazione di Ghjesù da i pastori, li si dava brocciu è fiadonu…
https://www.youtube.com/watch?v=rtgD3a87qhs

12) L’aranciu di Natale

A cunniscite quant’è noi quella riturnella di caccara chì conta chì da zitella ricevia un aranciu mìseru, da significà quant’elli èranu mischini i Natali di prima, mischini inde u sensu materiale chì a sucetà di cunsummu ùn avia ancu invasu tuttu.

Eppo vistighendu à pena in quà è in là, pò truvà omu chì cerca di chè turnà à riabilità quellu aranciu sugettu di vergogna è di vituperiu.

Iè, l’aranciu di Natale, era speziale impersunificava u « spiritu di Natale ».
Ci rimanda à u testu di Ghjacumu Fusina in « E sette chjappelle » à l’incantu di un zitellu chì u scopre a mane di Natale : « era quì, tòndulu, grande, luminosu, annant'à un lettu di paglia accantu à i scarpi : l'aranciu di Natale. Li paria chi l'aranciu illuminava a stanza sana. Ammirava, participava senza sapella à un cultu paganu cù sta riprisentazione di u sole chì rinasce. Dapoi tandu, stu lume di dicembre li tene u caldu, li dà sperenza, a forza di luttà… »

C’impara Ghjaseppina Giannesini in Tempi Fà : fetes religieuses, rites et croyances populaires de Corse : « Fruttu d’oru, rinvia à un inseme di fole è di credenze chì si raportanu à d’anziani cultu sulari chì si ne trova e vistighe inde a « mela d’oru » di u giardinu di l’Hespérides, chì era curatu da 3 Grées, figliole di Forcus, rè di Corsica è di Saregna ».

13) A cena di Natale

U sborru di manghjusca oghjinca ùn si contra mancu à pena cù i detti, pruverbii tradizunale : « À chì manghja carne a vigilia di Natale corpu di lupu è anima di cane " tantu più chì cascava l’ultimu ghjiornu di a Quàresima di l’Avventu. In tante famiglie corse, si manghjava dopu à a Messa di Mezanotte à suppa di tutti i ghjorni, cù l’urtaglie di stagione o puru a minestra di ceci cum’è a sera di u Ghjovi santu (Aghjacciu è Bastia).

U lindumane, a merenda era più ricca : carnugliu, caprettu è agnellu arrustiti, anguilla imbrustulita, figatellu, sangui natalecci…

C’era u caprettu, cum'ellu si dice : " Caprettu Natale, agnellu pasquale " , in Conca è ancu in Fiumorbu (U Sulaghju) si manghjava a rivredda cù a curata di u caprettu o di l’agnellu.

I figatelli, arrustiti cù u focu di Natale, si manghjavanu dinù cù qualchì fetta di pulenda.
" In Natale sanguinelli, in Pasqua migliacci è canistrelli " dice u pruverbiu, appuntu si manghjava i sanguinelli è u ventre pienu, s’impara nantu à u situ di l’Adecec chì :

« U sangue era battutu, si mettìa appena d'acqua, di sale, di peveru è secondu i lochi : pevaru mattu (Balagna), bietule, cipole, agliu, sellaru, menta, nepita, petrusellu … Dopu, si riempie i budelli cù stu mischju di sangue è d'erbe. Quandu u budellu hè pienu, hè chjusu cù una fucinella, è attaccatu in anellu : anelli di sangui, ciò chì face una caspa. Sta caspa sarà sciutta trè volte in un paghjolu d'acqua trimulente, è si dice in Arghjusta : " À u nome di Diu, di santi è tré ". St'anelli pudianu esse arrustiti à u mumentu di a cena […] Si face dinù u ventre, vale à dì a panza di u porcu piena. Si parla sempre di u stomacu pienu d'erbe cotte è spezie mischjate cù u sangue. L'erbe sò principalmente bietule salvatiche, si pò mette dinù agliu (Castagniccia) o un mezzu carbusgiu (Nebbiu). A panza hè messa in un paghjolu d'acqua bullente salata, induv'ella coce pianu pianu. Si manghja in fette, cù a broda di a cucera. »

Pè ciò chì tocca à i dulciumi, si ritrovanu ben’intesa l’agrumi, frutti secchi, noci è nucellule ecc…

14) A Nàscita di… Babbucciu Natale

Sò tante e dette tradizione cumparse inde l’anni 30, da u Babbucciu Natale, passendu pè u « tradiziunale » ghjallicu di Natale, i presepii, via si fece à st’epica quì un’unifurmizazione di a celebrazione nataleccia, sempre in vògula.

Dice Ghjaseppina Giannesini : « A scola di a Republica, eppuru laica, và à sparghje riti novi, cuncepiture nove di celebrazione di Natale chì anu da spazzà tradizione antichissime chì s’avianu francatu a cristianizazione ».
Sparghje quella scola u Babbu Natale è i so stereotippi chì unifurmizeghjanu a celebrazione, diventa tandu Natale una festa làica « avec ses dogmes, ses nouvelles croyances issues d’un fonds européen, mais soigneusement policées et vidées de leur contenu sacré ».

À sente à Ghjaseppina Giannesini sarebbe babbucciu natale « le Père Noel débonnaire et généreux est pourtant l’héritier syncrétique et aseptisé de vielles divinités des morts qui régissent la fécondité et la fertilité ».

U ghjallicu oghjincu ùn hà più tantu à chì vede cù l’arburi di vita chì simbulizavanu i ciculi, e rinascite, o l’axis mundi.

Ancu sè l’àrburu si ritrova pè e nostre sponde è ch’ellu si cantava inde e classe corse « Mon beau sapin », a tradizione di u ghjallicu adurnatu cù ghirlande è palle di culore si cunface pocu è micca cù e testimunianze nustrale induve eranu preferiti l’albitru è u caracutu chì i so baghi chjamavanu u rinnovu è a fertilità.
U fattu di veste u ghjallicu di Natale ci rimanda à l’Antichità ammentata più sopra è à i Rumani chì à i tempi di Saturnale adurnavanu e so case cù frasche sempre verde.

In certe famiglie, i rigali eranu dati da u " petit Jésus " o u " bon Ghjesù ",

Benchè intrudutte da i franciscani cù fini pedagogichi, i presepii casani di suchju pruvenzale cumpariscenu inde e case di i nutabili corsi inde l’anni 30 è ci vulerà aspettà a seconda metà di u XXu sèculu per ch’ellu si ne sparghji l’usu inde a sucetà tutta.

Infine, ci dice Ghjaseppina Giannesini :
« Les symboles, vides de leur sens, ont été repris pour instaurer ainsi une nouvelle célebration dont le but n’a plus rien de religieux , mais est devenu une simple célebration de l’abondance, parfaite illustration d’une société de consommation et de ses dogmes ».

15) Natale in Altrò Olentzeo è Caga Tio

Hè vera chì simu più avvezzi à cunvucà li i nostri amichi catalani è baschi pè parlà di pulitica, di pallò o puru di canzone…

Però, a li pruvemu à favvi scopre duie tradizione chì ci anu stupitu a prima hè l’Olentzero, un persunagiu di a mitulugia basca chì raprisenteghja un carbunaru, inde a mitulugia basca ghjè u portaluce chì annunzia u svegliu di u sole, di a natura è di a speranza.

In Catalonia hè sempre viva dinù a tradizione di u Tió de Nadal.
Hè di regula un ceppu di Natale chì e famiglie mettianu da brusgià, u so calore era u so rigalu di Natale. Manu à manu hè diventatau u ceppu un veru persunagiu, cù e so anche, u so visu è a so barretina, cappellu tradiziunale catalanu . Hè ammanatatu u Tió di un lenzolu da ch’ellu ùn chjappi micca fretu.

Ghjè à parte da l’8 di decembre (Immaculata Cuncezzione) ch’elli vanu i zitelli à dà li à manghjà à u pede di u ghjalgu è a vigilia di Natale, ci hè una vera frenesia chì i zitelli aspettanu chì u Tió caghessi i rigali, armati di bastoni menanu nantu à u Tió cantendu li :
Caga tió,Caga torró,
Avellanes i mató,
Si no cagues bé
Et daré un cop de bastó.
Caga tió !