A Filetta hà 40 anni

A Filetta hà 40 anni

12/02/2019

Si dice chì a filetta ùn more mai. A pudete taglià o brusgià, da e so radiche sode ne surterà sempre qualcosa. U gruppu musicale ellu, hè natu quarant'anni fà.

A Filetta, hè appena a Juventus di a musica corsa. Hè u gruppu chì hà ricevutu u più premii : trè "Grand prix" di l'academia Charles-Cros, trè "Diapason d'or", trè "Choc" di u Monde de la musique, un César di a musica di filmu ("Himalaya" cù a musica di Bruno Coulais).

In più di quessa, ci sò e participazione à parechje musiche di filmi à successu, e cullaburazioni cun parechji artisti tracunnisciuti (Akhenaton), e turnate mundiale nant'à tutti i cuntinenti.

A Filetta, hè a glassa. Passanu nant'à France Musique è ancu à Télérama ne sò scemi. Ghjocanu nant'à un'altra galassia.

Tuttu què hè partutu da un paese di Balagna, d'ottobre di u 78.

À l'epica, i capilluti eranu tullerati in i gruppi corsi.

È postu chì u gruppu hà festighjatu i so quaranta anni, hè l'occasione di turnà à scopre i so primi successi, quelli di l'anni 80. Dopu u gruppu hà fattu a scelta di piglià un'altra andatura, più pulifònica. Di st'epica ci fermanu e belle meludie è puesie.

Allora, vi ne site scurdati di A Filetta ?

1981 : Machja n'avemu un'antra

Primu discu di A Filetta, è un successu tremendu. In u top di i più belli dischi corsi di tutti i tempi (iè iè, ùn ci hè dubbitu).

Terra brusgiata (parolle di Michele Frassati, musica di Ghjuvanclaudiu Acquaviva).

Ma in mè la marturiata
Leva una sumenta nova
Chì assuva li mio solchi
Hè sumenta di rivolta

Vogliu esse (parolle di Michele Frassati, musica di Ghjuvanclaudiu Acquaviva).

Ste mane quì (parolle è musica di Michele Frassati). Una di e rare canzone corse à parlà di spluttazione di i travagliadori da u capitalisimu. U tema hè abbastanza raru in a musica corsa è in u naziunalisimu corsu per mintuvalla. Resite è sbarrazzassi di tutte e forme d'oppressione, ùn hè quessa dinù ?

U pagliaghju d'Ostriconi. Torna un successu di a mascina à tubes Frassati-Acquaviva. Oghje i pagliaghji sò stati rimpiazzati da e pagliotte. Tempi è tempi.

O vita (1982)

Impussibule di truvà musiche di stu discu. Pare ch'internet si sia scurdatu d'ellu.

Purtantu truvemu dui capilavori : L'orida bestia (Frassati / Acquaviva) nant'o u fascisimu :

Ùn hè micca cambiatu
Lu mondu chì c'intornia
In darnu aghju circatu
Ma ùn ci hè chè vargogna
Ch'assuffoga l'umani
Ch'imbrutta le so mani


È O Dumè o Muamè, puesia di Ghjuvanteramu Rocchi, chì ci parla di a spluttazione di i travagliadori immigrati.

Hè dinù nant'à stu discu ch'ellu si trova a L'impiccati (GT Rocchi / GC Acquaviva).

Infine, si trova una paghjella racolta in Rusiu. Ste parolle ci rammentanu ciò ch'ellu hè statu u spiritu di certi Corsi durante a segonda guerra mundiale :

Avertite à Musulinu
Chì hà tanta pretensione
S'ellu ùn hè più ch'è scimitu
Ch'ellu fia attenzione
Ch'ellu ùn appia da ingolle
A pulenda di granone

Cun tè (1984)


Nant'à u terzu discu di u gruppu truvemu a canzona Cun tè (Frassati / Acquaviva), umagiu à e donne chì si sò battute pè a so libertà.

I Mufrini (parolle di Ghjuvanteramu Rocchi è musica di Ghjuvanclaudiu Acquaviva). Cunnisciuta da tutti, hè diventata un mottu di rivindicazione : semu di stu paese, ci vulemu campà !

Cumpagnu (Frassati / Acquaviva), dedicata à Jean Antonelli, tandu imprigiunatu.

In l'abbriu di e stagione (1987)


U Mulatteru (parolle di Dumenicu Antone Versini, dettu Maistrale, musica di GC Acquaviva).

Pè 'ssu dumane (parolle di Marcellu Acquaviva, musica di GC Acquaviva). Torna un tube.

Di l'aghje (Marcellu Acquaviva / GC Acquaviva).

A Viuletta , cantu tradiziunale chì esiste cun parechji versi. A Filetta ci dice chì quessu hè statu racoltu in Curbara.

Sintenza per tè (M. Acquaviva / M. Filippi) hè didicata à Bobby Sands.

Bonus track : A Muntagnera

A Muntagnera (Marcellu Acquaviva / GC Acquaviva) hè una di e canzone e più emblematiche di u gruppu. Hè stata arregistrata nant'à u discu Una tarra ci hè (1994). A puesia traccia u viaghju d'un pastore niulincu trà Niolu è Falasorma.


Ma a musica si truvava digià nant'à u primu discu. Hè quella di a canzona Induvinella.

È s'è vo vuliate e piazze pè u cuncertu di i 40 anni in Bastia, ùn vale a pena di spicciassi. Hè digià tuttu cumplettu.