Ci simu beti un colpu cù u ministru di i sports di Plaid Cymru

16/06/2016
Tumasgiu Andrei

À u comptoir di u Betjeman Arms, un pub cunfurtèvule di a gara Saint Pancras di Londra, ci hè Neil McEvoy. Un stagnone di vinu rossu in e mani, discorre di u clash Paese di Gallia – Inghilterra di u lindumane cun dui cumbotti. Ùn sanu siguramente micca chì st'omu in polò turchinu scuru, capelli corti è neri cù u visu serenu hè u ‘shadow minister’ delegatu à u sport di Plaid Cymru, u partitu naziunalistu gallese. Poca supresa quand'ellu mette a soia è ch'ellu si mette à parlà d'identità, di spiritu culuniale è di Gareth Bale.

Dumane in Lens, andate à vede a partita di manera officiale o trà di ‘lads’ ?

(Surride) Nò, hè un viaghju finanzatu di manera privata cun amichi. Eviteghju tutte e ricezzione officiale. Sò da veru un fan di foot, aghju seguitatu a selezzione appena da per tuttu, in Azerbaidjan, in Alemagna, ecc. Stu viaghju hè appena differente per via di tutta sta viulenza cù i facisti russii chì danu fastidiu à tutti. Ma di manera strana, unisce i sustenidori inglesi è gallesi. M'anu dettu ch'elli s'aiutavanu tandu. Hè bè. Nanz'à quessa, pensava ch'elli ci sarianu prublemi cun l'Inglesi, cun i hooligans. Di regula quandu u Paese di Gallia ghjoca fora di casa, hè assai amichèvule. Cum'è cun l'Irlanda. Hè assai celticu, si cantanu canzone è si beie, passemu una bella stonda. Ùn avemu micca sta spezia di spiritu di cunquista, stu spiritu culuniale quand'ellu si ghjunghje in una cità. Ùn simu micca quì per duminà, solu pè scuntrà ghjente, beie vinu è biera.

"Sta partita hè una manera di sprime a nostra identità naziunale, di dì ch'è no simu sempre quì"

È l'Inglesi sò di più in stu statu di spiritu culuniale ?

Diceria di sì. Micca tutti, ma certi sì. Ferma una minurità. Truvemu sta listessa attitutine d'imperu culuniale ind'è i Russii.

Pudete parlacci di sta rivalità gallese-inglese ?

Ci hè una rivalità ma hè sopr'à tuttu magagna. U mo babbu vene d'Inghilterra, hà smubulatu à u Paese di Gallia anni passatoni, è hà più campatu à u Paese di Gallia ch'è in Inghilterra. Di u colpu, sustene u Paese di Gallia ! Sì sente gallese. Invece ùn sustene micca veramente a squadra di rugby, chì face piuttostu parte di l’establishment gallese. U futbol ùn hè micca cupertu di a listessa manera ch'è u rugby ind'è noi. Sta partita ferma una manera di sprime a nostra identità naziunale, di dì ch'è no esistemu, ch'è no simu sempre quì. Devi campà à u Paese di Gallia per capisce ciò ch'è no campemu ogni ghjornu. Accendimu a tv, ci hè u giurnale in inglese. English news. E nutizie naziunale. È ancu, naziunale ùn hè micca a parolla bona, chì ci sò parechje nazione chì ùn sò mancu rispettate in stu paese. Vince contr'à a Sluvacchia, era un bunissimu risultatu, ma ùn face micca e prime pagine. Sì l'Inghilterra s'intrena, tuttu u mondu ne parla. Simu stumacati è stanchi di tuttu què, simu ignurati. Dumane, ghjucheremu di modu uguale, 11 contr'à 11. È i pudemu batte. Ristabbilisceria l'affari, à livellu di a duminazione culturale.


Site un accanitu di Cardiff City, chì ghjoca in Championship (L2 inglese, NDLR), chì face d'ùn ghjucà ch'è contr'à i clubs inglesi ?

A ghjente chì và à i macci di ballò sò di più naziunalisti ch'è quelli chì vanu à vede u rugby. È quandu i fans d'in faccia principianu à cantà ‘God Save The Queen’, pruvucheghja sempre una sorte di sintimu dispiacente. L'Inglesi chì cantanu u so innu, impostu à tuttu u Reame Unitu. Listessa quandu vecu Union Jacks, u Paese di Gallia hè sclusu da a bandera, ùn simu mancu nantu. Di fatti, esse Britannicu, hè esse Inglese. Si vede quessa à u referendum, sì l'Inglesi votanu per sorte da l'Unione Auropea, surtimu tutti !

Gareth Bale, u vostru tercanu, hà dettu chì i ghjucadori gallesi anu di più fiertà è passione ch'è l'Inglesi. Chì ne pensate ?

Pensu chì Bale hà ragiò. Ci hè una spezia di crisa d'identità inglese. Si vede cù i hooligans. I Gallesi sò megliu cù a so identità gallese. Dopu, pensu chì i ghjucadori inglesi sò passiunati anch'elli. Ma sustene u Paese di Gallia significheghja siguramente di più ch'è di sustene d'altri paesi. Eppo cum'è vo a sapete, sò à prò di l'indipendenza di u mo paese. For'chè in materia di difesa, induve pensu chì l'Auropa, deve piglià u cambiu. Per ciò chì hè di l'affari esterni, duveriamu tene una spezia di consensus trà i paesi di l'isule britanniche. Sì l'Irlanda di u Nordu, a Scozzia è noi aviamu stu pudere à l'epica, ùn seriamu mai andati in Afganistanu o in Iraq. L'Inglesi ùn ne vulianu micca non più, ma Westminster ùn stà micca à sente. Ùn hè mancu una quistione di naziunalisimu, u populu vole qualcosa ma hè domu da un'elite educata in e scole private. Dumineghjanu tuttu u Reame Unitu pè u benefiziu d'un solu picculu lucucciu di u Sudeste di l'Inghilterra. U prublema, ùn sò micca l'Inglesi, sò e strutture britanniche. Sariamu più pròsperi s'è no surtiamu da tuttu què.


"Hè appena faciule di fà i belli cù a bandera gallese è d'ùn assume micca dopu"

Ci sò ghjucadori più naziunalisti ch'è d'altri in a selezzione ? Forse di più quelli chì ghjocanu sempre in Cardiff o Swansea ch'è Aaron Ramsey, chì hè in Londra dapoi parechji tempi.

Ùn sò micca. Ramsey parla gallese, digià. Tutti i ghjucadori s'arricordanu da induv'elli venenu, sò tutti attaccati à e so radiche. In ogni manera, quand'ellu ghjoca u Paese di Gallia, in ballò o altre cose, tuttu u mondu hè naziunalistu. D'un colpu. È dopu a ghjente vanu à vutà pè i partiti inglesi, u Labour, i Cunservatori, sò strutturalmente inglesi. Basati in Londra. Hè appena faciule di fà i belli cù a bandera gallese è d'ùn assume micca dopu. A ghjente risentenu u sintimu naziunalistu per una partita di ballò, duvimu truvà una manera di fallu risente dinù in pulitica.


À u livellu di a partita d'oghje...

(Taglia) Aghju da ditti : scumetti i to soldi nant'à u paese di Gallia. Quì, à u Reame Unitu, l'Inglesi mettenu assai soldi nant'à l'Inghilterra. Di u colpu, tutte e cutazione sò false. U Paese di Gallia hè à 6 contr'à 1, è Gareth Bale hè à 6 à 1 in tantu ch'è primu marcatore. Hà da finanzà u mo viaghju ! Avemu bunissimi ghjucadori, cum'è Ramsey, Williams (Ashley, difensore è capitanu di Swansea) è Bale chì averianu tutti a so piazza in a squadra d'Inghjilterra. Ma avemu sopr'à tuttu a cunfidenza. Stai à sente à Aaron Ramsey (mezuterrenu d'Arsenal, NDLR), dice di manera aperta chì « avemu una squadra migliore ch'è quella di l'Inghilterra. » Face prò di sente què, tanta cunfidenza in un giovanu gallese. Avemu bisognu di quessa à u Paese di Gallia, da per tuttu, à tutti i livelli. Sti tippi, Gareth Bale – u più bonu di u mondu dop'à Messi è Ronaldo – l'Inghilterra ùn ne hà. Anu bunissimi ghjucadori, cum'è Rooney, ma ùn hà micca e qualità di Gareth Bale. Sì Bale hè in un ghjornu bonu, avemu da vince.