U populu di e paillottes à l’assaltu di e lenze à l’abbandonu?

26/08/2017
Zenbucucciu

Serà u "rosé frais" ? Ogni tantu a cuscenza ecologica di i pippoli è di i so alliati si sveglia è si sunnieghjanu tutti in ortulani. «Ùn avemu micca da stà nant’à a rena cum’è lonzi spugliati per u sempre » averia dichjaratu un portaparolla. Allora quella Grande Zappera, sonniu o sunniacciu ? Basta à chjode l’ochji è à imaghjinà dumane...

Nantu à a bandera, a testa mora serà cinta à frasche castagnine incù pendini di chjarasge à l’orechja è rossu à e labbre.
L’urticelli si chjamaranu «Centres de remise en forme par le piochage énergétique».
Ci sera un ligatoghju pè i sumeri in lu parking di u Lounge Caffè.
Si puderà zappà solu di una manu è mandà un snap da l’altra.
L’innacquaghjoli seranu rebbii di mojito.
Serà pussibule di pagà in buatta di notte cù una sporta di fave.
Gucci escerà prufumi chjamati « Fior di zucchinu », « Vapore di Sudu » o « Acqua piuvana »
Ci seranu coaches spurtivi da aiutà à arricoglie i pomi «1,2, 3...si ghjimba...1,2,3 s’addirizza...»
U look spavechju serà fashion
A lavurera si ferà in tong o in string inuratu.
E ghjalle à e mani, più ch’è i tattuasgi seranu a suprema eleganza.
Si puderà maghjincà techju di cucaina
I DJ’s mischjeranu ronchi di sumeri è imbeli da fà ballà trà i solchi.
Ecc...

L’effetti di u rosé frais nantu à u populu di e paillottes ùn si ponu ancu misurà ma facenu a paura.