I storichi di u futuru studieranu l'anni 2000 cumu l'anni induve i Corsi si sò messi à corre. À corre o à fughje ùn si sà, ma oghje à u populu corsu li piace a corsa.

E corse cum'è A Spassighjata in Bastia o u City Trail Imperial in Aiacciu sò diventati evenimenti chì attiranu miraculi di ghjente. L'organizatori devenu limità e scrizzione davant'à sti successi.

In e muntagne, un trail hè l'occasione d'animà appena i paesi. Ci vole à dì chì fora di l'interri, l'occasione sò poche di vede u mondu.

Allora perchè micca ? Tempi fà, eranu e bucciate, o i turnei di ballò è e squadre di "sixte" chì attiravanu u mondu. Oghje ogni rughjone hà u so trail.

U primu hè forse statu u Grand Raid Inter-Lacs, organizatu in a Ristonica, in u 1998.

Tandu era piuttostu riservatu à i spurtivi cunfirmati. Dapoi l'affare s'hè demucratizatu. À cantu à e corse pè i pistelli ci sò piccule corse pè u grande publicu.

Quellu chì ùn hà un paghju di Salomon, una fruntale è una tenuta in Lycra ùn hè micca cunsideratu cumplettamente cum'è un veru Corsu.

Animazione in i paesi, appena di sport, scuperta di a natura è di a muntagna per certi, appena di leia suciale,... l'affari ùn ponu esse ch'è pusitivi.

Organizà una corsa in paese pò esse dinù l'occasione d'apre un chjassu chì era lamaghjosu, d'intrattene i lochi, di rifà una funtana, di fà scopre un itinerariu.

In più certi ùn mancanu micca di magagna, cum'è l'organizatori di a corse "Figatellu o pane seccu" in Ghisoni. U figatellu essendu riservatu à quelli chì ci la facenu à finisce a corsa.

Femuci un trail pè sensibilizà à a prublematica di u mullizzu cù u ruminzutrail chì faria u giru di i ruminzulaghji.

U trail Terre de résidences sgondaires pò fà scopre i lochi i più impiastrati da e case segundarie. L'INSEE face u censu di e case segundarie per cumuna. Si cuntava in u 2016 :

78% di residenze segundarie in Serra di Farru
77% in Lumiu
66% in Grussetu è Prugna
59% in Sari è Sulinzara
56% in Bonifaziu
56% in Portivechju...

È cumu l'affari sò impeghjuriti dapoi, piuttostu ch'è di cuntinuà à lagnacci, preferimu di cuntinuà à fughje.

À mezu à a scimizia nova pè u trail, ci hè Pierre Ghionga chì s'interrugheghja nant'à a sorte di a Corsica, "sans doute le territoire Européen où sont organisées le plus de courses de montagne depuis quelques années"...

Cumu riesce à prutege a muntagna, induve certi lochi sò digià troppu frequentati d'agostu (Melu è Capitellu, Ninu...) ?

Dice l'elettu curtinese : "Je m’exprime à titre personnel comme amoureux de la montagne corse, adepte de la marche contemplative et convaincu que la montagne doit rester le domaine de la spiritualité et de la lenteur, et non celui de la compétition et de la vitesse."

Difficiule di dalli tortu.

Per leghje a so intervenzione :

A so dumanda ci dà da riflette.