U 2 è 3 d'aprile sò i "prestaticci", è hè normale d'avè tempacciu

Chì i passiunati d'apperitivu in terrazza à u sole ùn s'inchietinu, l'estate venerà, ma micca subbitu. I primi ghjorni d'aprile si chjamanu i "ghjorni pristaticci" o "impristaticci" (in Niolu) o "imprestaticci" o "prestaticci" (in u restu di u mondu). Di regula u tempu ùn hè bellu. Colpa à i...

È chì face Will Smith ?

A scena hà fattu u giru di u mondu. À a cerimonia di l'Oscars, Will Smith hè andatu à truvà à quellu chì avia magagnatu a so moglia. È ùn mancanu e parolle per discrive stu gestu. A cerimonia era presentata da Chris Rock, chì pensava passà una serata tranquilla. Hè statu u casu, sin'à una magagna nant'à a moglia di Will Smith. Amusciatu, l'attore americanu s'hè pisatu per vindicà a so cumpagna. Per fà chè ? À voi di sceglie : Li hà messu (o sciaccatu) un schjaffu o un pattone. Si pò dì dinù un sciambulone (variante : un scialambulone). Certi dicenu ancu un pataffiu (variante : un patanfiu) o un scapizzone. Certi pumuntichi preferiscenu forse una sciappata (diventatu "une chapatte" in francese). Will Smith averà pensatu ch'ellu ci vole à minà in bocca à Chris Rock ogni volta ch'ellu parla ? Forse. Averia pussuttu di metteli una panetta o un scapochju, ma hà sceltu una manera menu dolce. Ma puderia esse stata peghju pè Chris Rock. Will Smith li averia pussutu…

Di marzu, si riparte

Eccu, hè ghjuntu u mese di marzu, cù i so detti è i so pruverbii. I cunniscite ? U mese di marzu hè riputatu per u so tempu chì varieghja : "Marzu catarzu" : vale à dì bruttu, goffu. È dinù : "Marzu hà sette barette, una a si caccia è l'altra si mette". L'antichi truvavanu u sole periculosu. Ùn si face casu chì semu sempre d'inguernu, ma pichja in capu : "Sole marzulinu, di l'omu ne face un strascinu". o "Sole marzulinu, di i vechji ne face un sterminiu". Di marzu ùn ci hè bisognu di vighjà. Bisognu à chjinassi à bon'ora : "E sere marzuline, appollati cum'è e ghjalline". (appullassi = "se percher, se calmer, se stabiliser"). Avà site prevenuti. Ne cunniscite d'altri ? Aspettemu i vostri cumenti.

C'era una vita nanzu à u tunellu

Hè l'evenimentu maiò di a Corsica di u terzu milleniu : u tunellu di Bastia hè chjosu per trè settimane. Tutti l'automobilisti di Corsica Suprana crocianu e dite per chì e trè settimane di chjusura previsti ùn diventinu mesi. È s'è no ùn ci pudemu più passà d'ellu, c'era purtantu una vita nanzu à u tunellu... Ci vole à crede chì noi altri Corsi ci annuiemu appena per chì a chjusura d'un tunellu durante trè settimane (à u mìnimu ?) diventi l'evenimentu maiò di quelli di quelli di a Corsica di u 2022. O forse serà gattivu segnu vistu chì in Corsica, senza vittura, ùn simu più nunda. U tunellu di Bastia, dettu "Tunnel du Vieux-Port de Bastia" (hè u so nome ufficiale) ùn face mancu un chilòmetru, hè statu apertu in u 1982 (dopu à 8 anni di travagli), è ùn hè ancu scrittu à i munumenti stòrichi di Bastia (cum'è i campanili di San Ghjuvà o u Palazzu di i Guvernatori). È mentre chì tutti i sguardi portanu versu sta custruzzione guasi storica, tuttu u…

Video : l'apertura di a prima università di Corsica

Omagiu à Petru Guelfucci

Un munumentu si n'hè andatu è ùn ci pare mancu vera. Cù a morte di Petru Guelfucci hè partutu un pezzu di a nostra cultura è di a storia cuntempuranea di a Corsica. E canzone ch'ellu hà interpretatu ci accumpagnanu dapoi più di quaranta anni. Eccu u nostru omagiu.

Video : Pesciu Anguilla, u primu rumanzu in corsu

I fiori chì piacenu à l'ape

Aiutate l'ape ! Per ch'elle trovinu da manghjà, ch'ellu sia pè u nettare o l'àmacu, punite o suminate ste piante è arburetti. È quand'è vo dirascate, ùn cacciate micca tuttu ! Lasciate cresce un locu salvaticu pè attirà l'ape. Senza elle, simu lecchi ! S'impresta à Albert Einstein sta frasa : « sì l’ape venissinu à sparisce di u pianeta, l’omu ùn averia più ch’è quattru anni à campà ». Eppuru sì u sapientone ùn hà mai dettu nè scrittu sta frasa, ci hè di chè esse preocupati. Allora perchè ùn circà di curà e piante mellìfere ? Ci sò fiori chì piacenu dipiù à l’ape ch’è d’altri, chì danu di più àmacu (pollen) o nettare. Certe si ponu piantà o suminà. Assai sò salvatiche è si ponu lascià cresce. Si pò aspettà u più tardi pussibule pè dirascà. Eppo si pò lascià un locu "salvaticu" in u vostru giardinu. Ùn vi sminticate : ciò chì si chjama « les mauvaises herbes », ùn esistenu micca !

Per San Valentinu, manda a to cartulina d'amore pulitica

I tempi sò duri. A visita di Macron ci hà insignatu chì u presidente ùn vulia di l'amore di i Corsi. Ancu di grazia chì per cunsulacci ci hè San Valentinu. Allora avemu preparatu unepoche di cartuline da mandà à u·a vosrtru·a innamuratu·a (d'appressu à un'idea di Lawra).

Video : da induve vene a torra di Bastia ?

Da u Sporting à i pacchetti di canistrelli passendu pè e giardiniere di a cità, a torra si vede in ogni locu quandu s'ammenta à Bastia. Ma cunniscite a so orìgine ?

Una bella rapresentazione di a Corsica... in Parma

S'è tù passi pè Parma, ferai una bella scuperta. Sta pittura stunante si trova in a cità di l'Emilia Romagna, nant'à i muri di a bibliuteca d'un munasteru. Bon d'accordu i nomi ùn sò micca sempre piazzati cum'ellu ci vole. Quand'ella hè stata fatta in u 1573, Google Maps ùn esistia micca. Ma ùn hè bella ? A Castagniccia hè chjamata sott'à u nome di "Le cinque pieve", chì eranu Casacconi, Ampugnani, Orezza, Rustinu è Vallerustie. "Zinatri" serà u nome di u castellu di Cinarca ?

Video : Nicolò Corso, u più grande pittore corsu

Nicolò Corso era un pittore corsu di u Rinascimentu. Troppu pocu cunnisciutu in Corsica, eccu un filmettu chì u presenta.

O Corsu, vai à scopre u to paese, hè u mumentu

A sapete, i Corsi cunnoscenu assai male a so isula. Pè u so rughjone, cità è paese d'origine, và bè. Ma quand'ellu si tratta d'alluntanassi, hè più cumplicata. I turisti ùn sò ancu à ghjunghje ind'è noi, allora perchè ùn prufittanne ? Trè anni fà, A Piazzetta avia publicatu un numeru per incuragisce i Corsi à girandulà in casa soia. u custatu hè tremendu : a Corsica, a cunnoscenu megliu i pumataghji chè i Corsi (micca sempre, ma guasi). Allora perchè micca prufittà di "l'effettu Govid" per andà à scopre un locu chì ne avete sempre intesu parlà, ma induve ùn avete mai messu un pede ? Sì i cummercianti ùn ci mettenu micca troppu bastunate, bella sigura.

I lochi di Bastia di Pesciu Anguilla

U primu rumanzu in lingua corsa, scrittu da Sebastianu Dalzeto, si passa in Bastia. Allora perchè micca andà à scopre à Bastia d'appressu à Pesciu Anguilla ? O scopre à Pesciu Anguilla d'appressu à Bastia. “Pesciu Anguilla”, sottu intitulatu “rumanzu bastiese” hè un libru scrittu in u 1929. Hè cunsideratu cum’è u primu rumanzu in lingua corsa.

Bastiacci, chì femu di u nostru patrimoniu ?

In sta campagna pè l’elezzione municipale, si parla di circulazione, di parkings, di rumenzule, di portu. È sì tutti i sugetti sò impurtanti, ci n’hè unu chì ci tene à core hè quellu di u patrimoniu. A Piazzetta tene à dumandà à i tutti candidati chì hè u so prugettu patrimuniale, è chì hè u so parè nant’à ondeci punti chì ci parenu di primura. Cum'è l'Ordre des Architectes de Corse chì hà interpellatu i candidati à l'elezzione municipale (pè tutta a Corsica), i Socios, u Cullettivu Salvemu a Citatella o a cuurdinazione Terra, dumandemu à i candidati à l'elezzione municipale bastiaccia chì hè u so prugettu patrimuniale in generale, è in particulare nant'à unepochi di punti.

Ma cumu si dice "chauve-souris" in corsu ?

Serà veramente una suppa di "chauve-souris" chì averà trasmessu a malatia à i nostri amichi Chinesi ? Casca bè, ci sò una quarantina di manere di dilla in corsu. Hè a fiura chì hà fattu u giru di u mondu, o piuttostu chì hà arrecatu u vomitu à tuttu u mondu. Sta suppa chinese serà quella chì hà trasmessu u coronavirus à l'omu ? Ùn si sà.

Spressione è pruverbii corsi illustrati da Lawra

U populu di u trail

In pochi anni, a Corsica hè diventata u paese di u trail. Ùn ci hè una pieve induv'ellu ùn passa una corsa. Sin'à induve ? I storichi di u futuru studieranu l'anni 2000 cumu l'anni induve i Corsi si sò messi à corre. À corre o à fughje ùn si sà, ma oghje à u populu corsu li piace a corsa. E corse cum'è A Spassighjata in Bastia o u City Trail Imperial in Aiacciu sò diventati evenimenti chì attiranu miraculi di ghjente. L'organizatori devenu limità e scrizzione davant'à sti successi. In e muntagne, un trail hè l'occasione d'animà appena i paesi. Ci vole à dì chì fora di l'interri, l'occasione sò poche di vede u mondu. Allora perchè micca ? Tempi fà, eranu e bucciate, o i turnei di ballò è e squadre di "sixte" chì attiravanu u mondu. Oghje ogni rughjone hà u so trail. U primu hè forse statu u Grand Raid Inter-Lacs, organizatu in a Ristonica, in u 1998.

Chì missaghju d'auguri mandà per capu d'annu ?

Pè l'auguri di capu d'annu hè un tsunamì di sms ch'ellu s'aspetta dop'à mezanotte. Quist'annu torna, sò per milioni chì i SMS seranu mandati à mezanotte. À chì li piace, à chì l'annerba, à chì si n'impippa, à chì serà digià chjinatu à ondeci ore. Ma per quelli chì mandatu i so auguri per messagiu, si pone a dumanda. Chì scrive quist'annu ?

U Cullettivu Massimu Susini : "a maffia in Corsica, nigà o luttà ?"

U 12 settembre Massimu Susini hè statu tombu da a maffia in Carghjese. Un mese dopu era creatu un cullettivu anti maffia. Li avemu postu unepoche di dumande nanz'à a ghjurnata organizata u 17 di dicembre, in Corti. Ci seranu dibattiti è una serata culturale.

Cumu a piaghja hè diventata Rumenzuland

Hè una regione ricca, bella, induv'ellu si trova u situ archeologicu u più impurtante di Corsica. Oghje, hè diventata a regione induve si mettenu e rumenzule chì nimu d'altru vole. Dop'à Tallone, Prunelli, ci serà Ghjuncaghju ? Si chjamava "A Piaghja". Avà u territoriu hè spartutu è si chjamanu e cumunità di cumune di "L'Oriente" è di "Fiumorbu Castellu". Hè a regione a più agrìcula di Corsica, è hè piena di ricchezze. Ci si trova u situ archeològicu u più impurtante di l'isula (Aleria). Quì ci sò ghjunti Cartaginesi, Grechi, Etruschi è Rumani. E bellezze naturale ùn mancanu : stagni di Diana, d'Urbinu, di Terrenzana, Mare è Stagnu. È l'interessi stòrichi non più : torre ghjenuvese, castellu di Covasina, chjese rumàniche, battisteru paleocristianu di Bravone...