Chì formule scrive per principià è finisce un mail ?

Chì formule scrive per principià è finisce un mail ?

Rédigé le 18/02/2019

18

L'angoscia di u mail da scrive esiste. Chì scrive in princpiu di lettera ? Cumu finisce ? Chì mette cum'è formula di pulitezza ? Serà troppu familiare ? Troppu scrianzatu ? O à u cuntrariu troppu fretu è distanzatu ? Per aiutavvi, eccu qualchì pista di riflessione.

Ùn hè micca semplice di sceglie a formula bona quand'ellu si manda un mail o una lettera (iè ! A carta esiste sempre !). Ùn si scrive di a listessa manera quand'omu s'addirizza à u so superiore o à un amicu.

Per principià

Classicu : Bonghjornu / Salute (o saluta)

À un amicu : O Cumpà / Amicu / Amicacciu / Carissimu

Variante sfrancizate : O pottò / o ancu : O vrère !

À i membri di una cumunità : Cari tutti / Cari amichi / Cari cumpatriotti / Cari socii / Carissimi

Variante militante : Cari fratelli è surelle di lotta

Variante militante chì ne face troppu : Cari fratelli è surelle tutti inseme adduniti pè a vittoria

Variante puetica : Cari amichi vi salutu, cù a zucca è cù l'ambutu (o l'imbutu)
Pudete circà d'altre rime.

Variante cù a scrittura inclusiva : Cari fratelli è surelle tutti·e inseme adduniti·e pè a vittoria

À i militanti in campagna alitturali :
Aìò zitelli !

Hè esistitu dinù in i tempi antichi : “Cari clandestini”

Cù dinamisimu (par fà creda à u distinatariu ch’edda hè una parsona impurtanti) : Mr X saluta ! (o “salute”)

À un Prisidenti : O Sgiò Prisidenti
esempiu : “O Sgiò Prisidenti di l’Assemblea” / “O Sgiò Presidente di l’Assemblea”

o puru :

“O Sgiò Presidente di l’Associu di l’amicale di i ghjucadori di bocce di a pieve di Cruzinu”

À un puttachjone : Stà à sente què,

À quellu chì pensa scrive à Pasquale Paoli : O Generale (marchja dinù per De Gaulle)

À quellu ch'è vo vulete mette una concia : O coccò, per principià ti calmi o t'aghju da calmà eiu

Più pueticu, per l'accaniti di i Chjami Aghjalesi : Caru cumpagnu girandulone

Per quelli chì preferiscenu I Muvrini : Ti scrivu à tè fratellu paisanu

Per l'incudiziunali di a paghjella : Carissimu cuginu, fidu è amatu

Per quellu chì vole lancià una mubilizazione : Vuleria principià per lampà una chjama

Per compie

Appena stereotipatu : Curdiali saluti hè megliu ch'è "curdialamente", cupiatu nant'à u francese.

Di più simpaticu : Sìntimi sinceri / Sìntimi fraterni

À un amicu : À truvacci prestu

Più francu : Ti salutu

À una parsona vicina :
In amicizia / Sintimi fraterni / Amicizia

Cù un raportu d’ugualità : Cun piacè

À un superiore : Cù rispettu

Per dà fiatu : Forza ! / Curagiu ! (o Curaghju) / Altru equivalente : Ànimu !

À i militanti d’una struttura :
Sintimi patriottichi / Cun fede patriotta
Sintimi republicani / Cun fede republicana
Sintimi clanisti / Cun fede clanista
Sintimi sarkozisti / Cun fede sarkozista
Sintimi clandestini / Cun fede clandestina

Variante :
Sintimi paulisti / Cun fede paulista
Sintimi bonapartisti / Cun fede bonapartista

Pussibule, ma ùn ci vole micca à esagerà :
Sintimi ribelli / Sintimi naziunali

À i militanti in campagna, quandu i tempi sò duri : Inseme, ci la feremu, eiu ci credu

À un Corsu spatriatu : Cun fiatu paisanu

Per un mail inviatu da un membre di a diaspora in brama di ritornu : Da quallà

A l’usu hacker o à l'usu Inspecteur Gadget : Ssu mail vi schiatterà in faccia (prevede d'aghjunghje una pezza in u mail chì schiatta in veru, ch'o sinnò passate à a risa)

À qualchissia in u bisognu :
Cù sperenza

À quellu chì face i so affari : Pè a frasca

À i sustinidori : Cun passione è fervore turchina (o rossa è bianca, rossa è turchina ecc…)

Furmula azeza garbata : Andate à fà vi leghje, curdialamente

Furmula azeza à botte : Pigliatevi ‘ssu mail in quellu locu

Furmula azeza azeza : Ùn ti (vi) salutu micca è ti (vi) pregu d'andà à fatti (favvi) leghje

Ultima lettera nanz'à a concia : È avà ùn ti vogliu più sente, ch'o sinnò collu à truvatti

D'altre pruposte ? Scriviteci puru un cumentu.

Messu in linea u 20/01/2018
Aghjurnatu u 18/02/2019