Quattru bone nutizie pè a lingua corsa nant'à internet

26/03/2018

"A cuufficialità, femula da per noi" ùn basta à dilla. Avà ch'è no sapemu ch'ellu ùn ci vole à aspettà nunda da u Statu, saria ora d'impatrunescesi di l'arnesi ch'ellu prupone internet per fà campà sta povera lingua corsa (chì certi anu digià interratu è alzatu un munumentu à a so memoria). È purtantu, ci n'hè chì a scrivenu è chì a leghjenu sempre. Eccu trè belle iniziative da salutà. Chì ne chjamanu d'altre?


Tonu & timpesta

Ùn si presenta più u blog animatu da Marcu Biancarelli è a so squadra. Pensavate ch'ella hè muribonda a prosa in lingua corsa ? Andate à lampacci un ochju. Attenti, u viaghju scuzzula.

tonutimpesta.blogspot.fr

Tempi

U situ Tempi hè statu lanciatu principiu di marzu. L'ambizione di i so giovani creatori : parla d'attualità, di geopulitica, di filusufia, d'ecunumia... in lingua corsa. Ci hè un situ web chì prupone articuli, ma dinù un filu d'attualità da seguità nant'à Twitter è Facebook. Attenti, si principia forte : Cumu s'hè salvatu Bashar al Assad ? o Emile Durkheim, u babbu fundatore di a suciulugia francese. Face prò. Una bellissima iniziativa da seguità è da incuragisce !

tempicorsica.com

U Sciintificuchju

Truvate ch'ellu manca un situ internet chì parli di scenze in lingua corsa ? Oramai hè fatta cù U Sciintificuchju, u "Science et Vie" nustrale ! Quì dinù, pudete seguità e pagine Facebook è Twitter.

usciintificuchju.com

Scrivimu a nostra lingua

U creatore di u situ Brandon Andreani s'attacca à a scrittura di u corsu. A dice ellu : "Quantu sò quilli chì parlani u corsu ma chì t'ani i guai à scrivalu ? Sò numarosi, tandu ghjuvemuci di sti reti suciali pà sparghja i reguli di a scrittura di a nostra lingua è aiutacci tutti i ghjorni trà di noi !"
S'ampara, è si ride.

scrivimuanostralingua.over-blog.com

Ci sò d'altre iniziative in lingua corsa nant'à u web è vulete falle cunnosce ? Mandateci un messagiu.