Eccu "U Cantu di u mare" à u cinema !

31/05/2018

O Disney, parlami corsu ! Aspettandu chì Walt fessi parlà corsu à stu topu di Mickey Mouse (un ghjornu ?), l'associu Fiura Mossa hà adattatu un filmu d'animazione in lingua corsa, "U Cantu di u mare". Ci seranu duie seanze sta dumenicata in Bastia.

Ci lagnemu spessu ch'ellu si passi pocu affare per ciò chì hè di a diffusione di a lingua corsa. Allora quand'ellu ci hè qualcosa di bè, ci vole à dilla !

Dop'à Yakari, U Grufalu è Una piazzola nant'à a spazzola, l'associu Fiura Mossa s'hè lanciata in l'adattazione d'un altru filmu d'animazione : U Cantu di u mare.

U filmu di l'irlandese Tomm Moore "Song of the sea" era surtitu in u 2014.

Ci vole à felicità l'associu Fiura Mossa per quessa. I capimachja sò Silviu Giannecchini è Ghjuvan Liviu Casalta chì hà fattu l'adattazione.

E voce corse sò di Matteiu Maria Giamarchi, Ghjuvan Cristofanu Ferrari, Carla Casalta, Ericcu Mattei, Diana Saliceti, Ivia Medori, Ghjuvan Petru Lanfranchi, Guidu Cimino è Francescu Berlinghi.

Hè Carlotta Rini chì canta a canzona di u filmu. L'arregistramenti sò stati fatti da Paul è Cristofanu Mac Daniel à u studiu Gecko.

Ci serà un DVD è una diffusione à Natale nant'à Via Stella.

Pè i Bastiacci, ci seranu duie seanze à u cinema Le Régent (u sabbatu 2 di ghjugnu à 2 ore è dumenica u 3 à 5 ore menu un quartu).

Ci seranu d'altre seanze in i cinema corsi. Per d'altre infurmazione, seguitate a pagine Facebook di Fiura Mossa :