Ùn ci vole mai à fà u maccu nanz'à un penalty

03/07/2016

Mancà un penalty, hè accadutu à i più grandi. Mancà un penalty dop'à avè fattu u maccu, hè veramente goffu. L'Italia pò pieghje. Zaza è Pellè si ponu piattà per parechji mesi.

Hè vera, ghjucà una partita cusì à i penalties hè terribule per quellu chì si face sorte. Sapemu dapoi Thierry Roland chì "les tirs au but, c'est la loterie". Ma nant'à a seanza di penalties d'Alemagna - Italia (18 tiri, 11 riesciuti, 7 mancati), i peghju sò stati quelli di Graziano Pellè è Simone Zaza.

Prima ci hè statu Pellè, chì magagna à Neuer è li dice ch'ellu hà da fà una panenka. À cantu.

Dopu ci hè Zaza. In a so corsa saltichjeghja, balla, piglia u so tempu, ùn si sà troppu. Sopra.

Pretensione ? Scuncentrazione ? Troppu pressione ? U web ùn parduneghja nunda è falanu scutrate nant'à i dui ghjucadori.

Serà megliu un'altru annu...